C'l artìcul chè 'l è scrit in Miranduléś |
I Right Said Fred (’T à dit bèṅ Fred) i èṅ un grup muśicàł pop ingléś furmâ in dal 1989 da i fradèi Fairbrass, Richard cantànt e Fred chitarìsta, tut dū plâ, uriginàri 'd East Grinstead in dal sud dl'Inghiltèra. In fiṅ a 'l 1997 in dal grup a gh'éra anc 'n àtar chitarìsta, Rob Manzoli. Al nóm dal grup 'l è qvél dna canta dal 1962 ad Bernard Cribbins.
In dla sò caréra i èṅ stâ bòṅ ad véndar da piò ad trénta migliòṅ ad disc, cavànd-'g-la a piasàr dal sò cansòṅ a 'l prim pòst dla clasìfica in stanta paéś, al prim grup ingléś a finìr in prima puśisiòṅ in dla Billboard c'n un sìngul ad debùt da i tèmp di Beatles.
Ólt'r a 'l prim disc Up, ch'l à vindû bèṅ in tut al mónd anc par via di sìngui I'm Too Sexy, Don't Talk Just Kiss e Deeply Dippy, anc al quàrt disc in studi Fredhead al gh'à abû sucès, specialmènt in Germàgna, Àustria e Śvisra.
La sò mùśica l'è stada druàda in stanta e pasa fra film, telefìlm, cartòṅ animâ e reclàm cuma Il mio amico scongelato, Prêt-à-Porter, Un party per Nick, The Simpsons e Angry Birds 2 - Nemici amici per sempre.
© MMXXIII Rich X Search. We shall prevail. All rights reserved. Rich X Search